बिहीबार नेपालमा थप ६ सय ७१ जनामा कोरोना संक्रमण देखिएको छ ।
स्वास्थ्य तथा जनसंख्या मन्त्रालयका अनुसार आज थपिएकासहित नेपालमा संक्रमित भएका व्यक्तिको संख्या ७ हजार ८ सय ४८ पुगेको छ । एकैदिनमा ६ सय भन्दा बढी कोरोना संक्रमित भेटिएको यो पहिलोपटक हो । हिजोमात्रै ५ सय ८६ जना कोरोना संक्रमित भेटिएका थिए त्यो नै हिजोसम्मको सर्वाधिक संख्या थियो ।
संक्रमितको संख्या ७ हजार ८ सय ४८ पुग्दा पुरुषको संख्या ७ हजार २ सय २९ छ भने महिलाको संख्या ६ सय २९ पुगेको छ । जसमध्ये केही नाबालाकहरु पनि छन् ।
विहिबारसम्म १ हजार १ सय ८६ जनाले कोरोनालाई जितेर घर फर्केका छन् । देशका विभिन्न अस्पताल र आइसोलेसन केन्द्रमा ६ हजार ६ सय ४८ जनाले उपचार गराइरहेका छन् ।
हिजोसम्म ७३ जिल्लामा देखिएको कोरोना संक्रमण आज मनाङ्ग जिल्ला थपिएपछि ७४ जिल्ला पुगेको छ । अब रसुवा ओखलढुंगा र मुस्ताङ्ग जिल्लामात्रै कोरोना नभेटिएका जिल्ला हुन पुगेका छन् ।
देशका ७७ जिल्लामध्ये ७४ जिल्लामा कोरोनाको संक्रमण फैलिइसकेको छ ।
आज भेटिएका ६ सय ७१ मध्ये ५ जना काठमाडौं उपत्यका भित्रका रहेका छन् । जसमध्ये भक्तपुर जिल्लाका ३ जना र काठमाडौंका २ जना हुन् ।
अहिलेसम्म नेपालमा १ लाख ५५ हजार ५ सय १८ जनाको पीसीआर विधिबाट कोरोना परिक्षण गरिएको छ ।
थप २ जनाको कोरोनाको कारणले निधन भएको हुँदा ज्यान गुमाउनेको संख्या २२ पुगेको छ ।
