काठमाडौं । विश्वब्यापी महामारी बनेको कोरोना भाइरसको संक्रमण गति भारतमा उच्च बनेको छ । दैनिक १० हजारको हाराहारीमा कोरोना संक्रमितको संख्या बढ्दै गएको छ ।
कोरोना अति प्रभावित ५ देशहरु मध्येका अमेरिका, रुस र ब्रिटेनमा संक्रमणको दर घट्दो छ भने ब्राजिल र भारतमा बढ्दो रहेको छ ।
कोरोना संक्रमणका हिसाबले दुई साता अघि ब्राजिल भन्दा पछि रहेको भारत अहिले नयाँ संक्रमितको बढ्दो संख्यासंगै ब्राजिल भन्दा अगाडी रहेको छ ।
दुई साताअघि भारत र ब्राजिलमा नयाँ संक्रमितको संख्या बढ्ने क्रम ५ प्रतिशत भन्दा बढी थियो भने अहिले भारतमा नयाँ संक्रमितहरु देखिने गति ४ प्रतिशत भन्दा बढी रहेको छ ।
गत दुई साताअघि भारतमा संक्रमण गति ५.६ प्रतिशत थियो । त्यस्तै ब्राजिलमा ५.४ प्रतिशत थियो । तर अहिले ब्राजिलमा संक्रमण गति घटेर ४.३ प्रतिशत पुगेको छ भने भारतको अवस्था ब्राजिलभन्दा बढी अर्थात ४.४ प्रतिशत रहेको छ ।
अति प्रभावित अन्य मुलुकमा संक्रमण गति २ प्रतिशत रहेको जोन हप्किन्स युनिभर्सिटीको तथ्यांकमा उल्लेख छ । हाल ब्रिटेनको संक्रमण गति घटेर ०.६ प्रतिशत पुगेको छ ।
भारतमा नयाँ संक्रमितको संख्या बढ्दै जानुलाई विश्व स्वास्थ्य संगठनले भयावहपूर्ण अवस्था भनेको छ । पछिल्लो तथ्यांकअनुसार रुसको परीक्षण गति प्रतिहजार ८७.२ प्रतिशत रहेको छ भने भारतको परीक्षण गति ३.४ प्रतिशत मात्रै छ ।
भारतीय आयुर्विज्ञान अनुशन्धान परिषद (आईसीएमआर) को तथ्यांक अनुसार देशभर दैनिक १ लाख ३ हजार परीक्षण गरिएको छ भने रुसमा ३ लाख, अमेरिकामा ५.१ लाख जनाको परीक्षण भैरहेको छ ।
कोरोना संक्रमणको गति तिब्र रुपमा बढिरहेको भारतको यो अवस्थाले खुला सिमानासंग जोडिएको नेपाल पनि अछुतो रहन सक्दैन ।
कोरोना संक्रमणको गति दैनिक ३ सय नाघेको नेपाल कम्जोर ब्यवस्थापकीय क्षमता र भारतसंगको खुल्ला सिमानाका कारण झनै ठूलो संकटमा पुग्ने विज्ञहरुले बताएका छन ।
