कोरोना भाइरसको महामारीका कारण नेपालको आर्थिक वृद्धिदर सन् २०२० मा १ दशमलव ८ प्रतिशतमा सीमित हुने विश्व बैंकले जनाएको छ ।
विश्व बैंकले एक प्रतिवेदन सार्वजनिक गर्दै सन् २०२१ मा २ दशमलव १ प्रतिशतमात्रै वृद्धिदर हुने पनि प्रक्षेपण गरेको छ ।
हालसम्म गरिएको प्रक्षेपणका आधारमा सन् २०२१ मा विश्वको अर्थतन्त्र रिबाउन्ड भई ४ दशमलव २ प्रतिशतको वृद्धि अनुमान गरिएको छ भने अति विकसित देशको अर्थतन्त्र ४ दशमलव ६ प्रतिशतले रिबाउन्ड हुने प्रक्षेपण गरिएको छ ।
त्यस्तै, महामारीले रिकभरीको बाटोमा रहेको नेपालको पर्यटन क्षेत्रमा समेत ठूलो असर परेको विश्व बैंकले रिपोर्टमा उल्लेख गरेको छ ।
विश्व बैंकका अनुसार नेपाल, भुटान, श्रीलंका, माल्दिभ्सजस्ता देशमा प्रत्यक्ष र अप्रत्यक्षरूपमा अर्थतन्त्रमा योगदान भएको भए पनि महामारीले त्यसमा समेत ठूलो असर गरेको छ ।
नेपालमा एक तिहाइ पर्यटक चीन र भारतबाट मात्रै आउने गरेको र महामारीका कारण सरकारले गरेको अन्तर्राष्ट्रिय सीमा तथा उडानमा लगाएको रोकका कारण यसले आगामी दिनमा गम्भिर असर पर्ने उल्लेख गरिएको छ । त्यसले पर्यटनसँग प्रत्यक्ष र अप्रत्यक्षरूपमा सञ्चालित बजार, आपूर्ति, आन्तरिक उत्पादन तथा निर्माणमा समेत असर परेको छ ।
