काठमाडौं, २५ जेठ । सत्तारुढ नेपाल कम्युनिष्ट पार्टी (नेकपा) की सांसद नविना लामाले अर्थमन्त्री डा. युवराज खतिवडाले चुनाव लड्न नपर्ने मनोविज्ञानसहित पार्टी नीति विपरीत बजेट ल्याएको आरोप लगाएकी छिन् ।

आज (आइतबार) संसद बैठकमा बोल्दै सांसद लामाले अर्थमन्त्रीले चुनाव लड्न नपर्ने भएकाले शिक्षा सम्बन्धी केही प्रावधान पार्टीको समाजवादी नीति विपरीत ल्याएको आरोप लगाइन् । सामुदायिक विद्यालयको व्यवस्थापन निजीलाई दिने प्रावधानप्रति उनले कडा आपत्ति जनाइन् ।

उनले भनिन्, ‘अर्थमन्त्रीले ल्याएको बजेट यो नेपाली जनाताले रगतसँग साटेको संविधानको भावना विपरीत छ । नेपाली विद्यार्थी आन्दोलनको भावना कुठाराघात गरेको छ । त्यति मात्रै होइन नेकपाको विचारधारा र हामीले भन्दै आएको समाजवाद विपरित छ । नेकपाको शिक्षा नीति विपरीत छ ।’

नेपालको संविधानको धारा ३१ ले सबै नागरिकले निशुल्क शिक्षा पाउने हक सुनिश्चित गरेको स्मरण गराउँदै सांसद लामाले बजेट पुस्तिकाको १६६ बुँदामा उल्लेखित विषय नेकपाको शिक्षा नीति विपरीत भएको बताएकी छिन् ।

उनले थपिन्, ‘शायद अर्थमन्त्री ज्यूले चुनावमा लड्नु पर्दैन भनेर यस्तो बजेट ल्याउनु भयो तर, पार्टी र सरकारको विचारधारालाई संकटमा पार्न हुँदैनथ्यो ।’

उनले शिक्षामन्त्री र अर्थमन्त्रीले सदनमा आत्माआलोचनासहित माफी माग्नुपर्ने समेत बताएकी छिन् । संविधान र पार्टीको चुनावी घोषणा पत्रमा समाजवाद राज्य व्यवस्था निर्माण गर्ने कुरा उल्लेख भएको भन्दै उनले ‘नेकपाको समाजवादको शिक्षा नीति यही हो ?’ भन्दै प्रश्न पनि गरेकी छिन् ।