लामो समयदेखि बहसको विषय बन्दै आएको अमेरिकी सहयोग परियोजना मिलेनियम च्यालेन्ज कम्प्याक्ट (एमसीसी) का बारेमा छलफल गर्न सत्तारुढ दल नेपाल कम्युनिष्ट पार्टी (नेकपा) ले सचिवालय बैठक बोलाएको छ ।
नेकपाका प्रवक्ता नारायणकाजी श्रेष्ठले बैठक सोमबार (भोलि) अपरान्ह ४ बजे प्रधानमन्त्री निवास बालुवाटारमा बस्ने जानकारी दिएका छन् ।
अघिल्लो सचिवालय बैठकले एमसीसीबारे छलफल गर्न छिट्टै अर्को सचिवालय बैठक बोलाउने निर्णय गरेअनुरुप नै यो बैठक बोलाइएको उनले बताएका छन् । उनले बैठकको बारेमा सचिवालय सदस्यहरुलाई सूचना आए पनि विषय भने नखुलाइएको बताए ।
‘नेकपाको सचिवालय बैठक भोलि दिउँसो ४ बजेका लागि बोलाइएको छ’, प्रवक्ता श्रेष्ठले भने, ‘अघिल्लो सचिवालय बैठकले एमसीसीबारे छलफल गर्न छिट्टै सचिवालय बैठक बोलाउने निर्णय गरेको थियो, त्यही अनुरुप यो बैठक बोलाइएको होला ।’
उनले बैठकमा वरिष्ठ नेता झलनाथ खनाल नेतृत्वको एमसीसी अध्ययन कार्यदलले पेस गरेको प्रतिवेदनमाथि छलफल हुने जानकारी दिए । नेकपाभित्रको आन्तरिक विवादले गर्दा एमसीसी सम्झौता संसदमा पेस हुन सकेको छैन ।
प्रधानमन्त्री एवं पार्टी अध्यक्ष केपी शर्मा ओली सो सम्झौता तत्काल पास गर्नुपर्ने पक्षमा छन् भने अन्य नेताहरु सम्झौता परिमार्जन गरेर मात्र पास गर्नुपर्ने पक्षमा छन् ।