नेपालमा कोरोनाभाइरसको संक्रमणबाट थप एक जनाको मृत्यु भएको छ।
त्रिवि शिक्षण अस्पताल महाराजगन्जमा उपचाररत दोलखाका पुरूषको उपचारको क्रममा बुधबार मृत्यु भएको हो।
योसँगै नेपालमा कोरोनाबाट मृत्यु हुनेको संख्या ९ पुगेको स्वास्थ्य मन्त्रालयले जनाएको छ।
बुधबार नेपालमा थप २ सय १ जना कोरोना संक्रमित फेला परेका छन् । योसँगै सङक्रमित हुनेको संख्या २ हजार ३ सय पुगेको छ भने पछिल्लो २४ घन्टामा १२ जना निको भएर फर्केका छन् । योसँगै निको हुनेको सङख्या २ सय ७८ पुगेको छ । जसमध्ये २ सय २२ जना पुरुष छन् भने ५६ जना महिला रहेका छन् ।
संक्रमितको संख्या २३ सय पुग्दा २ हजार १ सय ३० जना पुरुष हुन् भने १ सय ७० जना महिला छन् ।
देशका ७७ जिल्लाहरुमध्ये ६४ जिल्लामा कोरोना संक्रमण फैलिसकेको छ ।
प्रदेशअन्तरगत प्रदेश १ मा ४८ जना, प्रदेश २ मा १ सय ९ जना, बाग्मती प्रदेशमा ३१ जना, गण्डकी प्रदेशमा ३ जना, प्रदेश ५ मा ८० जना र सुदुरपश्चिम प्रदेशबाट ७ जना गरेर जम्मा २ सय ७८ जना संक्रमित निको भएका छन् ।