काठमाडौं । नेपालमा थप दुइजनाको मृत्यु कोरोना भाइरस (कोभिड–१९)को कारण भएको पुष्टि भएको छ ।
बाजुरामा दुई वर्षीया बालिका र दैलेख जिल्लाको दुल्लुको एक युवकको कोरोना भाइरसका कारण मृत्यु भएको पुष्टि भएको स्वास्थ्य मन्त्रालयले जनाएको हो ।
जिल्ला अस्पताल बाजुराको आइसोलेसनमा उपचाररत बालिकाकाे शनिबार राति करिब २ बजे मृत्यु भएको थियो ।
उनलाई १५ गते अस्पताल भर्ना गरिएको थियो ।
त्यस्तै शनिवार दैलेख जिल्लाको दुल्लु नगरपालिका –७ मा निर्माण गरिएको क्वारेन्टाइनमा मृत्यु भएका युवकको कोरोना परीक्षण गर्दा पोजेटिभ रिपोर्ट आएको थियो ।
कर्णाली प्रदेशका सामाजिक विकास मन्त्रालयका स्वास्थ्य महाशाखा प्रमुख डा. लक्ष्मी नारायण तिवारीले क्वारेन्टाइनमा मृत्यु भएका युवकको कोरोना भाइरस परीक्षण गर्दा रिपोर्ट पोजेटिभ आएको पुष्टि गरेका थिए ।
भारतबाट फर्किएका उनी क्वारेन्टिनमा बसेको १० दिन भएको थियो ।
यसअघि सिन्धुपाल्चोक, गुल्मी, अर्घाखाँची, ललितपुर, बारा र बाँकेमा पनि १–१ जनाको मृत्यु भएको थियो ।
योसँगै नेपालमा कोरोनाबाट मृत्यु हुनेको संख्या ८ पुगेको छ। यीमध्ये ७ जनामा मृत्युपछिमात्र कोरोना पुष्टि भएको हो।
समाचार हिजो नै आएपनि स्वास्थ्य मन्त्रालयले आइतबार मात्र पृष्टी गरेकाे हाे ।