जिल्ला अस्पताल बाजुराको आइसोलेसनमा उपचाररत २ वर्षिया बालिकाको मृत्यु भएको छ ।
एक साताअघि भारतको दिल्लीबाट आएकी बाजुरा बुढीगंगा नगरपालिका-१ की ती बालिकाको आइतबार बिहान मृत्यु भएको हो।
बालिकामा ज्वरो, झाडापखाला, श्वास फेर्न गाह्रो हुनेजस्ता लक्षण देखिएको अस्पतालका प्रमुख रूपचन्द्र विश्वकर्माले जानकारी दिए।
त्यस्तै आइतबार नै डडेल्धुरामा क्वारेन्टाइनमा बसेका एक बालकको ज्यान गएको छ । नवदुर्गा गाउँपालिका–३ का साढे ६ वर्षका बालकको आइतबार राति १२ बजे मृत्यु भएको डडेल्धुराका प्रहरी नायव उपरीक्षक दधिराम न्यौपानेले जानकारी दिएका छन् ।
जिल्ला सदरमुकाम नजिकै रहेको डडेल्धुरा बहुमुखी क्याम्पसको क्वारेन्टाइनमा बालकको ज्यान गएको उनले जानकारी दिए ।
आमा–बाबुसँगै उनी भारतको मुम्बइबाट आइतबार राति मात्रै डडेल्धुरा पुगेको पाइएको प्रहरीले जनाएको छ । ‘राति पुगेकाले बहुमुखी क्याम्पसको क्वारेन्टाइनमा राखिएको थियो’ डीएसपी न्यौपानेले भने, ‘हामीलाई बालक गम्भिर छन् भनेर आयो । यताबाट गाडी पठाएर अस्पताल पुर्याएका थियौं ।’
बालकको अस्पताल पुर्याउनु भन्दा अघि नै मृत्यु भएको डडेल्धुरा अस्पतालका निमित्त मेडिकल सुपरिटेन्डेन्ट डा जगदीशचन्द्र विष्टले बताए । उनका अनुसार ती बालकलाई बिहान ३ बजे अस्पताल पुर्याइएको थियो ।
उनको शव अहिले डडेल्धुरा अस्पतालमा राखिएको छ । उनको आइतबार नै कोरोना परीक्षणका लागि थ्रोट स्वाब संकलन गरिने निमित्त मेसु विष्ट जानकारी दिए ।