प्युठानमा यही जेठ १३ गते क्वारेन्टिनमा मुत्यु भएकी महिलाको पिसिआर रिपोर्ट नेगेटिभ आएको छ ।
ऐरावती गाउँपालिका वडा नं ६ बिजुली जनता माध्यमिक विद्यालयमा निर्मित क्वारेन्टिनमा बस्दै आएकी महिलाको पिसिआर परीक्षण गर्दा रिपोर्ट नेगेटिभ आएको स्वास्थ्य कार्यालय प्युठानका प्रमुख विशाल सुवेदीले जानकारी दिए ।
ती महिलाले लामो समयदेखि भारतमा बे्रन ट्युमरको उपचार गराइरहेकामा चिकित्सकले निको नहुने भनी घर पठाएका थिए ।
उनीसंगै क्वारेन्टिनमा बसेका उनका श्रीमान्, आमा, भाइ र दुई छोराको यसअघि आरडिटी रिपोर्ट नेगेटिभ आएको थियो ।
घरमै पुगेर गर्भवतीको उद्धार
बाजुराको बडीमालिका नगरपालिकाका नगरउपप्रमुख कविता विष्टसहितको टोलीले घरमै पुगेर गर्भवती महिलाको उद्धार गरेको छ । सोही नगरपालिका वडा नं ९ मार्तडीकी २२ वर्षीया पवित्रा सार्कीको घरमै नगरपालिकाको एम्बुलेन्स लिएर उद्धार गरिएको हो ।
जिल्ला अस्पतालमा शुक्रबार जाँच गर्न गएकी दलित महिला सार्कीलाई जिल्लामा सम्भव नभएपछि धनगढी पठाएपछि आर्थिक अभावका कारण घर लगिएको थियो । सार्कीको परिवारसँग धनगढी जान एम्बुलेन्सको भाडा तिर्न आर्र्थिक नभएपछि घर लगेको बताइएको छ ।
नगरपालिकाकै सहयोगमा गर्भवती सार्कीको एम्बुलेन्समार्फत धनगढी पठाइएको वडा नं ८ का वडाध्यक्ष प्रकाश रावलले बताउनुभयो । उहाँले सार्कीले योभन्दा पहिला दुईपटक शल्यक्रिया गरेर बच्चा जन्माएकाले जिल्ला अस्पतालले अन्यत्र सिफारिस गरेपछि आर्थिक अभावमा घरमा लगिएको सञ्चारमाध्यममा समाचार आएपछि उद्धार गरिएको वडाध्यक्ष रावलले बताए ।
दुईपटक भन्दाबढी शल्यक्रिया गर्दा निकै जटिल हुने भएकाले सेती प्रादेशिक अस्पताल धनगढीमा पठाएको जिल्ला अस्पतालका चिकित्सक शेरबहादुर साउदले जानकारी दिए ।
उनले तेस्रोपटक शल्यक्रिया गर्दा रगतको व्यवस्थापन त्यस्तै परे पाठेघर नै फाल्नुपर्ने अवस्था हुनसक्ने भएकाले जिल्लामा बच्चा जन्माउन सम्भव नभएपछि सिफारिस गरेको डा साउदले बताए । सघन उपचार कक्ष व्यवस्थापन भएको ठाउँमा मात्र सुत्केरी गराउन डा साउदले सुझाव दिएका छन् ।
