अमेरिकी सहयोग परियोजना एमसीसी संसदबाट अनुमोदन नभएसम्म काम रोक्ने समझादारी नेपाल कम्युनिष्ट पार्टी (नेकपा)भित्र बनेको छ। शनिबार बसेको पार्टीको सचिवालय बैठकले सम्झौता अनुमोदन नभएसम्म त्यसअन्तर्गतका कामहरु नगर्ने समझदारी बनेको हो। बैठकपछि प्रवक्ता नारायणकाजी श्रेष्ठले अनुमोदन नभएको अवस्थामा एनसीए अन्तर्गतका काम राक्ने समझदारी बनेको बताए ।
‘एमसीसीका बारेमा मुख्यतः बजेटमा प्रस्तुत अनुसूचिमा राखिएको एमसीसीको योजनाका बारेमा आवश्यक स्पष्टताका निम्ति छलफल भएको हो’ बैठकपछि नेकपा प्रवक्ता नारायणकाजी श्रेष्ठले भने, ‘प्रस्ताव अहिले संसदमा विचाराधीन छ । त्यसैले बजेटको व्यवस्था पनि त्यही अनुसार हुने कुरालाई स्पष्ट पारिने अर्थात प्रधानमन्त्रीले संसदलाई जानकारी गराउनु भएअनुसार नै एमसीसी सम्झौता अनुमोदन भएको खण्डमा त्यस अनुसार हुनेछ ।’
एमसीसी सम्झौताका बारेमा पार्टीले गठन गरेको कार्यदलले प्रतिवेदन यसअघि नै प्रतिवेदन बुझाइसकेको बताउँदै श्रेष्ठले भने, ‘त्यो प्रतिवेदन समेतलाई अध्ययन गरेर छिट्टै सचिवालय बैठकमा गम्भीर छलफल गरी आवश्यक निश्कर्षमा पुग्ने सहमति भएको छ ।’
अर्को बैठकको मितिबारे अध्यक्षद्वयले आपसमा छलफल गरेर तय गर्ने निर्णय भएको श्रेष्ठले बताए ।
नेकपामा फेरी तनाव ! बजेटमा एमसीसी घुसेपछि सरकार ढाल्ने खेल शुरुसंसदबाट एमसीसी सम्झौता अनुमोदन नभइसकेको अवस्थामा एमसीसी एकाउन्ट नेपाल अन्तर्गतका कामहरु अनुमोदन भएपछि मात्रै गर्ने निर्णय भएको पनि प्रवक्ता श्रेष्ठले जानकारी दिए । संसदबाट अनुमोदन नभई गर्न सकिने बाहेक त्योसँग जोडिएका कामहरु अनुमोदन नहुँदासम्म रोकिने उनले बताए ।
एमसीसीबारे छिनोफानो नभएसम्म बजेट अनुमोदन हुन्छ कि हुँदैन भनी सोधिएको प्रश्नमा नेकपा नेता श्रेष्ठले भने, ‘बजेट त आफ्नो प्रक्रियाअनुसार अनुमोदन भइहाल्छ तर एमसीसी जो बजेटमा उल्लेखित छ, यथार्थ के हो भने एमसीसीसम्बन्धी सम्झौता संसदमा नै विचाराधीन रहेकाले अनुमोदन हुने वा नहुने संसदले जे फैसला गर्छ, त्यहीअनुसार हुने स्वतः स्पष्ट भएकाले त्यही कुरा अर्थमन्त्रीले संसदलाई जानकारी दिनुहुनेछ । जुन कुरा यसअघि सम्माननीय प्रधानमन्त्रीज्यूले संसदलाई जानकारी दिइसक्नुभएको छ ।’
नेकपामा फेरी तनाव ! बजेटमा एमसीसी घुसेपछि सरकार ढाल्ने खेल शुरु
सत्तारुढ नेपाल कम्युनिस्ट पार्टीभित्र फेरि नयाँ विवाद निस्किएको छ । सरकारले प्रस्तुत गरेको आगामी आर्थिक वर्षको बजेटमा अमेरिकी च्यालेन्ज कर्पोरेशन (एमसीसी) को विषय घुसाएपछि विवाद निस्किएको हो ।
सत्तारुढ दल नेकपाभित्रै एमसिसीबारे विवाद रहेकाले एमसिसीले सहयोग गर्ने भनिएका कार्यक्रम अर्थमन्त्री डा. युवराज खतिवाडले बजेटमा समावेश गर्दै कार्यान्वयनमा लैजाने घोषणा गरेका थिए ।
जसमा एमसिसीको सहयोगमा अघि बढाउने भनिएको लप्सिफेदी–रातामाटे–दमौली–बुटवल र लप्सिफेदी–रातामाटे–हेटौँडा विद्युत् प्रसारणलाइन बजेटमार्फत नै अघि बढाइएको छ भनेर उनले बजेट भाषणमा प्रस्ट पारेका थिए । धेरै नेपालीले याद नगरे पनि केटिएम दैनिकले तत्काल समाचार बनाएको थियो ।
यी आयोजना सरकारको नीति तथा कार्यक्रममा पनि समावेश गरिएको थियो । जसको विरोधमा संसदमा नेकपाकै सांसद भीम रावलले चर्को विरोध गरेका थिए ।
बजेटमा एमसीसी घुसाएपछि शुक्रबार अपरान्ह अध्यक्ष समेत रहेका प्रधानमन्त्री केपी शर्मा ओली निकटका नेताहरुले जुम बैठक गरेका थिए । विश्वस्त स्रोतका अनुसार उपाध्यक्ष बामदेव गौतमले जुम बैठकको व्यवस्था गरेका थिए । गौतमसहित अध्यक्ष पुष्पकमल दाहाल प्रचण्ड, वरिष्ठ नेताहरु झलनाथ खनाल र माधवकुमार नेपालका अलावा प्रवक्ता नारायणकाजी श्रेष्ठ जुम बैठकमा सहभागी भएका थिए । उनीहरुले सरकारको कार्यशैलीको समिक्षा गरेको बुझिएको छ ।
सरकारले ल्याएको राजनीतिक दल र संवैधानिक परिषदसम्बन्धी अध्यादेशका बेलामा ओलीविरुद्ध बनेको गुट फेरि ब्युँतिएको छ । सचिवालयका यीनै पाँचजना त्यतिबेला ओली हटाउन सम्मको निर्णयमा पुगेर लागेपनि आपसी मतभेदका कारण असफल भएका थिए । बामदेव गौतमलाई प्रधानमन्त्री बनाउने प्रस्ताव ल्याएर ओलीले गुट भत्काइदिएका थिए । तर, ओलीको कार्यशैलीप्रति स्वयं गौतम निकै असन्तुष्ट बनेपछि अब चाहिं नटुट्ने गरी एकता गरेर जाऔं भन्दै पाँच जनाको बैठक डाकेका थिए ।
एमसीसीबारे ओली निकट नेताहरु पनि विरोधमा छन् । उनीहरुले संसदबाट एमसीसी पारित गर्न केही विषयमा संशोधन हुनुपर्ने अडान राखेका छन् ।
अहिले शुरु भएको सचिवालय बैठकमा एमसीसी बजेटमा घुसाइएको विषयका अलावा नक्शा संसदमा छलफलका लागि पेश गर्न गरिएको ढिलाई, लकडाउनको समिक्षालगायतमा छलफल हुने बुझिएको छ । आज ओलीमाथी उनी निकट रहेका नेताहरु आक्रामक ढंगले प्रस्तुत हुने तयारीका साथ बालुवाटार पुगेका छन् ।
विश्वस्त स्रोतका अनुसार केही नेताहरुले सरकार ढाल्न फेरि नयाँ अस्त्र तयार गरेका छन् । यसपटकको अस्त्र एमसीसी लगायतको हुने बुझिएको छ । ओली सरकारमाथि एकैपटक धेरैवटा अस्त्र प्रहार गर्ने गरी नेकपाभित्रका नेताहरुको एक गुट पूर्ण तयारीका साथ बढेको छ ।