काठमाडौं, १३ जेठ । गुल्मीका एक युवकले आफु कोरोना संक्रमित हुँ भन्दै परिचय खुलाएका छन् । उनी नै पहिलो कोरोना संक्रमित हुन् जसले आफ्नो परिचय आफै खुलाएका छन् । यस अघि पहिलो पटक नेपालमा कोरोना पुष्टि भएकी किशोरीले पनि आफुलाई सार्वजनिक गर्न चाहेकी थिइन् ।
केही भिडियो अन्तरवार्तामा उपस्थित भएकी थिइन् । गुल्मी धुर्कोट गाउँपालिकाका अध्यक्ष भुपाल पोखरेलले आफु कोरोना संक्रमित भएको र आफ्नो परिचय लुकाउन नचाहेको बताउँदै सार्वजनिक भएका छन् । उनी नेपालमा कोरोना भाइरस पुष्टि भएपछि आफ्नो व्यक्तिगत विवरण खुलाइहाल्ने पहिलो संक्रमित हुन् ।
देशमा ७७२ जना कोरोना भाइरसको संक्रमित भइसक्दा ७७१ जनाले आफ्नो परिचय खुलाएका छैनन् । खुलाएकी एक महिलाले पनि नीको भएर घर फर्किंदा मास्क लगाएर टेलिभिजन अन्तवार्ता दिएकी थिइन् ।
अध्यक्ष पोखरेलले १० जेठमा स्वाब परीक्षण गरिएकोमा कोरोना भाइरसको संक्रमणमा परेको पत्ता लागेको खुलाएका छन् । आफू धुर्कोट गाउँपालिका र सदरमुकाम तम्घास मात्र गएको अवस्थामा पनि संक्रमित भएको बताएका छन् । उनले आफ्ना बारेमा विज्ञप्ती जारी गरेर सर्वसाधारणलाई जानकारी दिएका छन् ।
धुर्कोट गाउँपालिका अध्यक्ष पोखरेलले विज्ञप्ति नै जारी गरी संक्रमति भएपनि आफू सामान्य रहेको बताएका छन् । आइशोलेशनमा पनि गाउँपालिकाको काममा लागिरहने बताएका छन् । उनले आज जारी गरेको विज्ञप्तिमा एकान्तवासका बखत समग्र धुर्कोट गाउँपालिकाको आगामी योजना र समृद्ध धुर्कोट निर्माणमा लागिरहने बताएका छन् । उनले भनेका छन्, ‘यस संक्रमणलाई मैंले अवसरका रुपमा लिएको छु ।’
पोखरेलले धुर्कोट गाउँपालिका कोरोना भाइरसको उच्च जोखिममा रहेको हुँदा प्राथमिक स्वास्थ्य केन्द्रबाट दिइन सेवा हाललाई बन्द गरिनुका साथै निश्चित क्षेत्र सिल गरिएको जानकारी समेत दिएका छन् ।