कपिलबस्तु जिल्लाका कोरोना भाइरस संक्रमितहरुको संख्या बढ्दो क्रममा रहेका कारण जिल्लालाई जेठ २० गतेसम्म पूर्ण रुपमा सिल गर्ने निर्णय गरिएको छ।
जिल्ला सुरक्षा समितिको सोमबार दिउँसो बसेको बैठकले सरकारले घोषणा गरेको लकडाउनको समय जेठ २० गते राती १२ बजेसम्म जिल्ला शिल गर्ने निर्णय गरिएको प्रमुख जिल्ला अधिकारी दिर्घ नारायण पौडेलले बताए।
यस अवधिमा अति आवश्यकीय सवारी साधन बाहेक सबै सवारी साधनलाई पूर्ण रुपमा रोक लगाइएको छ।
राजमार्ग क्षेत्रमा चल्ने सवारी साधनहरुलाई भने जिल्लामा रोकेर कसैलाई चढाउन र झार्न नमिल्ने बताइएको छ।
अति आवश्यकीय समाग्रीहरु, खाद्यान्न र औषधी खरिदका लागि प्रत्येका सोमवार, बुधवार र शनिवार विहान ७ बजेदेखि ९ बजेसम्म समय मिलाइएको प्रजिअ पौडेलले बताए।
जिल्ला सिल भएको अवस्थालाई उल्लघंन गर्ने उपर स्थानीय प्रशासन ऐन २०२८ को दफा ६ (३) क र संक्रामक रोग ऐन २०२० दफा २ (१) बमोजिम कारवाही हुने जिल्ला प्रशासन कार्यालयले जनाएको छ।
जिल्ला प्रशासन कार्यालय तथा गृह मन्त्रालयबाट जारी भएका ईपासहरु पनि यस अवधि सम्मका लागि स्वत निष्क्रिय हुने जनाईएको छ।
संक्रमितको संख्या ३५७ पुग्दा २९८ जना पुरुष रहेका छन् भने ५९ जना महिला छन् । तीमध्ये केही नाबालक पनि छन् । अहिलेसम्म ३६ जना उपचारपछि निको भएर घर फर्केका छन् भने २ जनाले ज्यान गुमाइसकेका छन् ।