सुनसरीको कोशी गाउपालिका स्थित हरिपुर क्षेत्रको सप्तकोशी नदीको किनारमा झाडीमा लुकेर बसेका १५ जना भारतिय नागरिक फेला परेका छन ।
सिमा प्रहरी चौकी भाण्टावारीको टोलीले सप्तकोशी नदी किनारमा रहेको झाडीमा ओढने ओछयाउने, झोला, पोकापोकी र साईकलसहित भारत बिहार राज्य घर बताउने १५ जना भारतिय नागरिकहरु लुकेर बसेको अवश्थामा फेला पारेको हो ।
आइतवार दिउसो गाई वस्तुलाई धाँस काटन गएका स्थानियहरुले सप्तकोशी नदीको किनारमा झाडी भित्र लुकेर बसेका मानिसहरुको समुह देखि सिमा प्रहरी चौकीलाई खबर गरेका थिए ।
प्रहरीले झाडीबाट सप्तकोशी नदीको पुर्वी तटबन्धमा ल्याएर सोधपुछ गर्दा एजेण्टले रकम लिएर आफुहरुलाई सुरक्षित स्थानमा नपुगेसम्म यही बस्न लगाएका लुकेर बसेको बयान दिएका थिए ।
नेपाल भारत सिमाक्षेत्रमा सरकारले सशस्त्र प्रहरी र जनपथ प्रहरी परिचालन गरि सिमाक्षेत्रमा आवतजावतमा निगरानी गर्न सुरु गरेपछि रातीको समयमा लुकिछिपी मकैवारीको बाटोबाट सिमाना वारपार गर्ने क्रम बढदै गएको छ ।
त्यस्तै कन्टेनर भ्यानमा आज बिहान धुलिखेल आइपुगेका ५० भारतीय मजदुरलाई सिन्धुपाल्चोक फर्काइएको छ ।
जिल्ला प्रशासन कार्यालय काभ्रेपलाञ्चोकले उनीहरुलाई बिहान धुलिखलस्थित बस बिसौनी नजिकैबाट नियन्त्रणमा लिएको थियो ।
सिन्धुपाल्चोकबाट बिहान ८ बजे धुलिखेल आएका ती भारतीय नागरिकलाई नियन्त्रणमा लिइ मध्याह्नतिर उतै फकाईएको जिल्ला सङ्कट व्यवस्थापन केन्द्रका संयोजक एवं प्रमुख जिल्ला अधिकारी श्रवणकुमार तिमसिनाले बताए । उनका अनुसार ती भारतीय नागरिकलाई धुलिखेलस्थित खेलमैदानमा राखेर सावधानीपूर्वक खाना खुवाएर दुई गाडीमा सिन्धुपाल्चोकतर्फ नै फर्काइएको हो ।