काठमाडौं—पछिल्ला २ महिनामा नेपालमा दादुराका कारण दुई जना बालवालिकाको मृत्यु भएको छ । दादुराबाट १ सय ७० जना संक्रमित भएका छन् ।
परिवार कल्याण महाशाखा खोप शाखा प्रमुख डा. झलक शर्मा गौतमले मार्च महिनामा धादिङमा दादुराका कारण दुई जना बालवालिकाको मृत्यु भएको जानकारी दिए । उनकाअनुसार एक जना ९ महिना र अर्को ५ वर्षका बालकको दादुराका कारण मृत्यु भएको हो ।
गत पुसदेखि बैशाखसम्म झापामा २१, सर्लाहीमा ६, धादिङमा ३ पटक गरी ११३ जनामा दादुरा देखिएको छ । धादिङमा पहिलो पटक ९१, दोस्रो पटक ७ र तेस्रो पटक १५ जनामा दादुरा देखिएको छ ।
त्यसैगरी, ललितपुरमा १८ र काठमाडौंमा १४ जनामा दादुरा संक्रमण पुष्टी भएको उनले जानकारी दिए । पछिल्लो समय चितवनमा पनि दादुराको आशंका गरिएको छ । यस वर्ष सबैभन्दा बढी दादुरा देखिएको धादिङमा १५ वर्षमुनीका २० हजारमा दादुरा-रूबेला खोप लगाउने तयारी सरकारले गरिरहेको छ ।
गत फागुन र चैतमा सञ्चालन भैरहेको दादुरा—रुबेला राष्ट्रिय खोप अभियान कोभिड—१९ का कारण पूरा हुन सकेन् । विज्ञहरूकाअनुसार एक जना दादुरा संक्रमितले १६ जनामा संक्रमण सार्न सक्छ ।
