काठमाडौं, १० बैसाख । काठमाडौंको टेकुस्थित शुक्रराज ट्रपिकल तथा सरुवा रोग अस्पतालमा उपचाररत धादिङका युवा कोरोनालाई जित्न सफल भएका छन् ।
दुबईबाट आएका धादिङका ३२ वर्षीय युवा निको भएपछि आज (बुधबारए अस्पतालले उनलाई घर पठाउने तयारी गरेको छ । ती युवालाई आज डिस्चार्जको तयारी भइरहेको अस्पतालका निर्देशक सागर राजभण्डारीले जानकारी दिएका छन् ।
दुई नर्सको रिपोर्ट नेगेटिभ, डिस्चार्ज गरिंदै
(आरडीटी) विधिबाट परीक्षण गर्दा कोभिड–१९ पोजिटिभ देखिएका दुई जना नर्समा पीसीआर परीक्षण गर्दा कोरोना नभएको पुष्टि भएको छ ।
केन्द्रीय कारागारका कैदीहरुको स्वास्थ्य परीक्षणमा खटिएका उनीहरुलाई मंगलबार आरडीटी विधिबाट गरिएको कोरोना भाइरसको जाँचमा रिपोर्ट पोजेटिभ देखिएको थियो । पोजिटिभ देखिएका दुबै जनालाई उपचारका लागि टेकुस्थित शुक्रराज ट्रपिकल तथा सरुवा रोग अस्पतालको आइसोलेसन राखिएको थियो ।
आज (बुधबार) स्वाब संकलन गरी पीसीआरबाट गरिएको परीक्षणको रिपोर्ट बुधबार बिहान आएको र नेगेटिभ देखिएको शुक्रराज ट्रपिकल तथा सरुवा रोग अस्पताल टेकुका एक चिकित्सकले जानकारी दिएका छन् । अब उनीहरु दुवैलाई डिस्चार्ज गर्ने तयारी गरिएको उनले बताएका छन् ।