९ वैैशाख, काठमाडौं । निजी विद्यालयले एक सातापछि अर्थात् वैशाख १५ देखि नयाँ भर्ना र परीक्षाफल प्रकाशित गर्न शुरू गर्ने भएका छन् । कोरोना संक्रमणका कारण करिब एक महिनादेखि देशभरका विद्यालयका परीक्षा र भर्नालगायतका सम्पूर्ण काम ठप्प छ । सरकारले यही १५ गतेसम्म लकडाउन कायम राखेको छ ।
अधिकांश विद्यालयले कक्षा १–९ को परीक्षा सम्पन्न गरे पनि परीक्षाफल प्रकाशित गर्न पाएका छैनन् । चैत पहिलो साता केही ठँला विद्यालयले कक्षा १ र माथिल्लो कक्षाको प्रवेश परीक्षाको मिति तय गरेका थिए । चैत ६ गतेबाट विद्यालय बन्द भएपछि प्रवेश परीक्षा लिएका केही विद्यालयले परीक्षाफल प्रकाशित गर्न सकेका छैनन् भने केहीको परीक्षा रद्द भएको थियो ।
निजी तथा आवासीय विद्यालय अर्गनाइनेसन नेपाल (प्याब्सन)का अध्यक्ष टीकाराम पुरीले लकडाउन लम्बिए वा नलम्बिए पनि यही १५ गतेबाट बाँकी रहेका विद्यालयको परीक्षाफल प्रकाशित गर्न पत्राचार गर्ने बताए । सरकारले लकडाउन खुला गरे पनि तत्काल विद्यालय खोल्न अनुमति दिँदैन ।
प्याब्सन अध्यक्ष पुरीले हिजो सोमबार शिक्षा, विज्ञान तथा प्रविधिमन्त्री गिरिरराजमणि पोखरेललाई कक्षा सञ्चालन र प्रवेश परीक्षा लिने विषयमा जानकारी गराइसकेको बताएका छन् ।
प्याब्सनको हिजो भएको अनलाइन बैठकले कक्षा सञ्चालन गर्ने विषयमा कुराकानी गरेको थियो । प्याब्सनले सबै प्रदेश, जिल्ला, स्थानीय कमिटीलाई पत्राचार गरी नयाँ परीक्षा सञ्चालन, प्रवेश परीक्षा र नयाँ भर्ना गर्ने विषयमा निर्देशन दिने भएको छ ।
एनप्याब्सनका अध्यक्ष ऋतुराज सापकोटाले अनलाइन वा अफलाइन (टिभी, एफएम) लगायतका माध्यमबाट पढाइ शुरू गर्नुको विकल्प नभएको बताउँदै त्यसका लागि सरकारसँग सामग्री माग गरिएको जानकारी दिए ।
देशभर करिब ९ हजार निजी विद्यालयमा करिब २० लाख विद्यार्थी अध्ययन गरिरहेको तथ्यांक छ । प्याब्सन र एनप्याब्सनले विभिन्न सरोकारवाला निकायसँग छलफल गरी अनलाइनबाट कक्षा सञ्चालन गर्ने विषयमा निर्णय गरिसकेको छ ।
कतिपय विद्यालयले हिजैबाट अनलाइन कक्षा सञ्चालन गरिसकेका छन् । अधिकांश विद्यालयले कक्षा ११ र १२ का विद्यार्थीका लागि अनलाइन कक्षा सञ्चालन गरिरहेका छन् । सरकारले भने अबको एक सातामा अनलाइन वा अन्य विधिबाट कक्षा शुरू गर्ने तयारी गरिरहेको जनाएको छ । (रासस)
