भाटभटेनी सुपरस्टोरको नामबाट देशका सुविधा सम्पन्न विभिन्न मुख्य शहरमा ठूलो रिटेल चेन सञ्चालन गरिरहेको भाटभटेनी समूहले लकडाउनकै अवधिमा पनि राजधानी उपत्यका काठमाडौं बाहिरका विभिन्न आउटलेट खोल्ने अनुमति पाएको छ । गुणस्तरीय दैनिक उपभोग्य वस्तु खरिद गर्ने ग्राहकको चाहनालाई मध्यनजर गर्दै २०७७ वैशाख ५ गते शुक्रबारदेखि उपत्यकाभित्रका ६ वटा स्टोर र उपत्यका बाहिर विराटनगर, धरान, नारायणगढ, बुटवल, भैरहवा, पोखरा, नेपालगन्जमा खुला गर्ने निर्णय गरिएको भाटभटेनी सुपरस्टोरका चिफ अपरेटिङ अफिसर पानु पौडेलबाट जानकारी दिइएको छ ।
भाटभटेनी ग्रुपले कलंकी, महाराजगन्ज, नक्साल, भक्तपुर, कोटेश्वर र पुल्चोकको आउटलेट खोलेर उपभोक्तालाई सेवा दिन लागेको हो । ललितपुरको सातदोबाटो तथा काठमाडौंको चुच्चेपाटी, बालाजु, अनामनगर र त्रिपुरेश्वरस्थित आउटलेट भने बन्द नै रहने बताएको छ ।
भाटभटेनी समूहले उपत्यकाबाहिर पनि विराटनगर, धरान, नारायणगढ, बुटवल, भैरहवा, पोखरा, नेपालगन्जमा पनि भाटभटेनी सुपरस्टोरको नामबाट आउटलेट सञ्चालन गरेको छ । उपत्यकाबाहिरका आउटलेट पनि खुला रहनेछन् ।
प्राणघातक रोग कोभिड–१९ निम्त्याउने कोरोना भाइरस संक्रमणको त्रासले मुलुक लकडाउनमा गएपछि भाटभटेनीले उपत्यकाका आउटलेटहरु बन्द गरेर होम डेलिभरी सेवा दिंदै आएकोमा अब खोलेरै सेवा दिन लागेको विषयलाई अन्य व्यवसायीले भने सरकारको दोहोरो मापदण्ड भनेर चर्को आलोचना भएको छ ।
उल्लेखित आउटलेटहरु बिहान १०ः०० बजेदेखि साँझ ७ः०० बजेसम्म स्टोर खुला रहने जानकारी दिइएको छ । कोरोना संक्रमण रोकथामका लागि पर्याप्त सावधानी अपनाएर आउटलेट सञ्चालन गरिने बताइएको छ । एकपटकमा स्टोरभित्र १० जनालाई मात्रै प्रवेश दिइने र त्यसमा पनि सोसियल डिस्ट्यान्सिङ कायम गर्ने नीति लिइएको पनि जानकारी दिइएको छ । अन्य व्यवसायीले यही मापदण्ड अपनाएर व्यापार गर्न पाउने कि नपाउने भन्ने प्रश्न पनि दोकारदारहरुले उठाएका छन् ।
भाभटेनीलाई दिइएको सुविधा अन्य त्यस्तै प्रकृतिका पसलहरुले कारोवार गर्ने छुट पाउने कि नपाउने ? लकडाउनको समयमा पनि भाटभटेनीले व्यापार गर्न पाएको छुट अन्यले नपाउने हो भने, सरकारको सौतेलो व्यवहार भनेर मान्नु पर्ने हुन्छ । अन्य पसलेलाई विहान २ घण्टा मात्र पसल खोल्न छुट हुने भाटभटेनीलाई चाहिं (९ घण्टा) दिउ“सो उपभोक्ता हिंडुल गर्न नपाउने लकडाउनको समयमा संचालन गर्न दिने सरकारको नीतिको हो विभेद ? गंभीर प्रश्न उठेको छ ।
‘लककडाउनको कारण सिर्जित विषम परिस्थितिमा ग्राहकको गुणस्तरीय सामान खरिद गर्ने चाहनालाई मध्यनजर गर्दै स्टोर खुला गर्ने निर्णय गरिएको हो,’ भाटभटेनीले भनेको छ । उसले ‘स्टोरमा पर्याप्त सावधानी अपनाइएको छ, ग्राहकले सोसियल डिस्ट्यान्स कायम गरेर ढुक्कले सामान खरिद गर्न सक्नुहुन्छ ।’
भाटभटेनीको यही भनाईलाई आधारमा मानेर अन्यले पनि हामीमाथि सरकारको असमान व्यवहार भयो भन्दै समान व्यवहारको माग गरेका छन् । अब प्रश्न उठ्छ अन्य व्यवसायीले भाटभटेनीले तय गरेकै आधार प्रस्तुत गरेर ९ घण्टा व्यवसाय संचालन गर्ने अनुमति पाउने कि नपाउने ? सरकारले तत्काल यसको जवाफ दिनुपर्ने माग जनस्तरबाट उठेको छ ।
ललिता निवासको सरकारी जग्गा हड्प्न संलग्न रहेको आरोपमा अख्तियार दुरुपयोग अनुसन्धान आयोगबाट मुद्दा खेप्दै आएका भाटभटेनीका मालिक मीनवहादुर गुरु¨ हुन् । यिनै गुरु¨ले भाटभटेनीको ब्यापारबाट करोडौं भ्याट छल्ने, राजश्व मार्ने, गरेको आरोप सर्बोच्च अदालतबाट प्रमाणित भएको छ ।
यस्तै देशघातीहरुले जे सुविधा माग्यो त्यही सुविधा पाउने ? राज्यलाई ठग्नेहरुले संकटकालमा पनि विशेष सुविधा उपभोग गर्न सरकारले अनुमति दिएको घटनाले सरकार कस्ता समूह र व्यक्तिका लागि काम गर्दैछ भन्ने गंभीर प्रश्न पनि उठेको छ ।
साँघु न्यूजबाट साभार गरिएको ।