जनकपुरधाम। जनकपुरधामको महावीर चोकस्थित सडकमा पैसा फालेर त्रास फैलाउने दुई महिलाको र्यापिड डायग्नोस्टिक टेस्टमा एकजनाको कोरोनो पोजेटिभ देखिएको छ।
हिजो सडकमा पैसा फालेर भागेको दुईजनालाई प्रहरीले आज पक्राउ गरी आरडिटीमार्फत कोरोना परीक्षण गरिएको थियो। त्यसक्रममा दुईजना मध्ये एकजनाको नतिजा पोजेटिभ देखिएको हो। उनीहरूको नमुना संकलन गरी पिसिआर विधिमार्फत परीक्षणका लागि जनकपुर पठाइएको छ।
प्रहरीले सिसिटिभी क्यामेराको फुटेजको आधारमा धनौजी गाउँपालिका ५ बहुअर्वाकी ५० वर्षीया अमुना खातुन र उनकी नन्द जनकपुरधाम ७ की ३५ वर्षीया अलिना खातुनलाई पक्राउ गरेको थियो। जनकपुरधाम उपमहानगरपालिका ७ बाट पक्राउ परेका उनीहरूलाई प्रहरीले कोरोना परीक्षणका लागि प्रादेशिक अस्पताल लगेको थियो।
प्रदेश प्रहरी कार्यालयका प्रवक्ता एसपी जयराज सापकोटाले पैसामा थुकेर कोरोना भाइरस फैलाउने प्रयास गरेकाले दुवैको कोरोना परिक्षण गर्न अस्पताल लगिएको जानकारी दिए ।
उनले भने, ‘कोरोना परीक्षणको रिपोर्टमा पोजेटिभ देखिएको छ। अहिले अनुसन्धान भइरहेको छ। उपचारसँगै कानुनी कारबाही अघि बढाउँछौँ।’
शुक्रबार दिउँसो महावीर चोकमा उनीहरूले मुख छोपेर १० रुपैयाँको अन्दाजी १३ वटा नोटमा थुकेर फालेर भागेका थिए। भारतमा पैसाको नोट फालेर कोरोना फैलाउने प्रयास भएको थियो। त्यसकै नक्कल गर्दै सडकमा पैसाको नोट फालेकाले महावीर चोकका सर्वसधारण त्रसित बनेका थिए।
