भारतमा सोमबार कोरोना भाइरसका नयाँ संक्रमित ह्वात्तै बढेका छन्। सोमबार एकैदिन भारतमा १ हजार २ सय ४८ जनामा कोरोना भाइरसका संक्रमण भएको पाइएको छ। सोही दिन भारतमा २७ जनाको मृत्यु कोरोना भाइरसको संक्रमणका कारण भएको छ।
वर्ल्डोमिटर्सको तथ्याङ्क अनुसार हालसम्म भारतमा कोरोना भाइरस संक्रमितको संख्या १० हजार ४ सय ५३ पुगेको छ। कोरोनाकै कारण हालसम्म भारतमा ३ सय ५८ जनाले ज्यान गुमाएका छन्।
भारतमा पछिल्ला दिन कोरोनाका संक्रमित बढ्ने क्रम हेर्दा भारत छिट्टै कोरोना भाइरसको नयाँ इपिसेन्टर बन्ने खतरा बढेको छ। यसले नेपालमा पनि कोरोना भाइरसको खतरा बढाएको छ।
भारतमा १० लाखभन्दा बढी नेपाली रहँदै आएका छन्। तीमध्ये केही लाख नेपाली लकडाउन अघि र लकडाउनको समयमा नेपाल फर्केका छन्। अझै पनि ठूलो संख्यामा नेपालीहरु भारतमा रहेका छन्।
नेपालमा हालसम्म भेटिएका १४ जना कोरोना भाइरसका संक्रमितमध्ये धेरैको सम्बन्ध भारतसँग जोडिएको छ। केही भारतीयहरु लकडाउनका बेला पनि अवैध तरिकाले नेपाल प्रवेश गरेको र उनीहरुमा कोरोनाको संक्रमण भएको पाइएको छ। यसले नेपाललाई पनि खतरा रहेको स्पष्ट देखाएको छ। बेलैमा भारतसँगको सीमाबाट हुने आवतजावतलाई नियन्त्रण गर्न नसकिए यसले नेपालमा पनि भयावह अवस्था सिर्जना गर्ने स्पष्ट छ।
आइतबार एकैदिन भारतमा कोरोनाका कारण ४३ जनाको मृत्यु भएको थियो भने ७ सय ५९ जना कोरोनाका नयाँ बिरामी थपिएका थिए। शनिबार एकैदिन भारतमा ८ सय ४६ जनामा कोरोन भाइरसको संक्रमण भएको पाइएको थियो भने ३९ जनाको मृत्यु भएको थियो।
शुक्रबार एकैदिन भारतमा ८ सय ७५ जनामा कोरोनाको संक्रमण देखिएको थियो। सोही दिन भारतमा कोरोनाका कारण २२ जनाले ज्यान गुमाएका थिए।
अप्रिल १ यता भारतमा औसत दैनिक ५ सयभन्दा बढी कोरोना भाइरस संक्रमित थपिदै आएका छन्। अप्रिल १ मा भारतमा ६ सय १ जना नयाँ बिरामी देखिएका थिए। भोलिपल्ट अप्रिल २ का दिन ५ सय ४५ जनामा यो भाइरस देखिएको थियो। अप्रिल ३ मा ५ सय १६ जना कोरोना भाइरसका नयाँ बिरामी भारतका अस्पताल पुगेका थिए।
अप्रिल ४ मा ५ सय २९ जनामा भारतमा कोरोना भाइरस देखिएको थियो। अप्रिल ५ का दिन थप ७ सय १ जना भारतमा कोरोनाका बिरामी थपिएका थिए। अप्रिल ६ को दिन नयाँ ४ सय ८९ जनामा कोरोनाका संक्रमण भएको पाइएको थियो।
अप्रिल ७ मा भारतमा ५ सय ७३ जना कोरोना भाइरसका नयाँ संक्रमित भारतमा थपिएका थिए। अप्रिल ८ मा यो संख्या ५ सय ६५ पुगेको थियो। अप्रिल ९ मा भारतमा ८ सय ९ जना नयाँ संक्रमित भेटिएका थिए।
