केटीएम दैनिक । १ वैशाख २०७७, काठमाडौं : भारतमा कोरोना भाइरसका नयाँ संक्रमितहरु थपिने क्रम दिनानुदिन बढ्दै गइरहेको छ । बितेको २४ घन्टायता यहाँ ७ सय ९८ जना नयाँ संक्रमितहरु भेटिएका छन् ।
भारतीको स्वास्थ्य तथा परिवार कल्याण मन्त्रालयलमा उपलव्ध तथ्याङ्क अनुसार सोमबार बिहानको ‘कोभिड १९’ का संक्रमितहरुको सङख्या ९ हजार १ सय ५२ जना पुगेको छ ।
पछिल्ला केही दिनमा कोभिड १९ का संक्रमितहरुको संख्या बढ्दै गएको सरकारको भनाइ छ । भारतमा शुरुदेखि नै सबैभन्दा बढी संक्रमित महाराष्ट्र राज्यमा देखिएका छन् । सोमबार पनि यो क्रम जारी नै रहेको सो मन्त्रालयले जानकारी दिएको छ ।
भारतीय स्वास्थ्य तथा परिवार कल्याण मन्त्रालयले दिएको जानकारीअनुसार भारतभर गएको २४ घन्टा यता मृत्यु हुनेको संख्या ३५ रहेको पाइएको छ । योसँगै भारतमा कोरोना संक्रमणबाट ज्यान जानेको संख्या ३ सय ८ पुगेको छ ।
महाराष्ट्रमा कोभिड १९ का संक्रमितहरु दिन प्रतिदिन बढ्दै गएका छन् । महाराष्ट्र राज्यमा मात्र संक्रमितहरुको संख्या १ हजार ९ सय ८५ जना पुगेको सोमबार विहान प्राप्त समाचारमा जनाइएको छ ।
महाराष्ट्रमा मात्र १ सय ४९ जनाको ज्यान गएको बताइएको छ । यहाँका २ सय १७ जना उपचारपछि घर फर्किएका छन् । यसरी भारतका अरु राज्यहरुको तुलनामा महाराष्ट्र सबैभन्दा बढी प्रभावित भएको देखिएको समाचारमा जनाइएको छ ।
भारतमा देखिएका यी संक्रमितहरुमध्ये ८ सय ५७ जना संक्रमित भने उपचारपछि निको भएर घर फर्किएका छन् । मन्त्रालयले दिएको जानकारीअनुसार यहाँ ८ हजार भन्दा बढी कोरोनाका संक्रमित विरामी विभिन्न अस्पतालमा उपचाररत छन् ।
महाराष्ट्रपछि सबैभन्दा बढी विरामी संक्रमित नयाँ दिल्लीमा छन् । नयाँ दिल्लीमा मात्र १ हजार १ सय ५४ जना संक्रमित रहेका छन् । भारतमा यसरी दिन प्रतिदिन नयाँ नयाँ संक्रमितहरु थपिँदै जानु चुनौतीपूर्ण भएको यहाँका स्वास्थ्य अधिकारीहरुले जनाएका छन् ।
त्यसैगरी तेस्रो बढी संक्रमित राज्यमा तमिलनाडु रहेको छ । तमिलनाडुमा कोरोना संक्रमण भएका व्यक्तिको संख्या सोमबार बिहानसम्म १ हजार ४३ जना पुगेको छ । राजस्थान, मध्यप्रदेश, तेलङ्गना, गुजरात र छत्तीसगढ राज्यमा कोरोनाका संक्रमितहरु भेटिएका छन् । गएको २४ घन्टायता त्यहाँ पनि पहिलेको तुलनामा धेरै संक्रमित भेटिएका हुन् ।
तलको तालिकाबाट हेर्नुहोस कुन राज्यमा कति (संक्रमित, ज्याउन गुमाउने र निको हुनेहरु )
