१ बैशाख २०७७ । काठमाण्डौ : प्रधानमन्त्री केपी शर्मा ओलीले बुधबारसम्ममा हुने प्रगतिको आधारमा लकडाउनको समय थप्ने वा नथप्ने निर्णय गर्ने बताएका छन् ।
नयाँ वर्षको अवसरमा शुभकामना सन्देश दिँदै ओलीले बुधबारसम्म लकडाउन गर्ने यसअघिकै निर्णय कार्यान्वयन गर्न आग्रह गर्दै मङ्गलबार र बुधबार हुने प्रगतिको आधारमा कोरोना महामारीविरुद्धको नीति तय हुने बताएका हुन् ।
लकडाउन बढाए पनि आपूर्ति प्रणालीलाई कमजोर हुन नदिइने ओलीको दावी छ । कोरोनाको सङ्क्रमणबाट जोगिन व्यक्तिगत दुरी आवश्यक रहेकाले लकडाउन गरिएको पनि उनले बताए ।
विश्वका विभिन्न देशमा फैलिएको कोरोनाका कारण अहिलेसम्म १७ लाखभन्दा धेरै सङ्क्रमित भएको अवस्थामा नेपालमा प्रति १० लाख शून्य दशमलव ३ प्रतिशतमा मात्रै सङ्क्रमण हुनु लकडाउनका कारण मात्र सम्भव भएको प्रधानमन्त्री ओलीको दाबी छ ।
नेपालमा अहिलेसम्म १३ जनामा काेराेना सङ्क्रमण पुष्टि भएकाेमा एक जना उपचारपछि निकाे भएर घर फर्किसकेका छन् भने बाँकी १२ जनाकाे उपचार भइरहेकाे छ ।
प्रधानमन्त्री केपी शर्मा ओलीले कोरोना भाइरस (कोभिड–१९)को महामारी समाप्त नभएसम्म पारिश्रमिक नलिने घोषणा समेत गरेका छन् ।