भारतीय मिडियामा अत्यधिक नाम लिइएका पर्सा जगरनाथपुर गाउँपालिकाका अध्यक्ष जालिम मुखियाले चैत्र १९ गते नेपाल प्रवेश गराएका २४ तवलिगी जमातीहरु मध्ये ३ जनालाई कोरोना संक्रमण भएको पाइएको आएपछि जालिम मुखियाको बारेमा धेरैले चासो देखाएका छन् ।
कान्तिपुर दैनिकको अनलाइन संस्करण र भारतीय च्यानल आजतकले जालिम मुखियाको बारेमा धेरै जानकारीहरु उपल्वध गराएका छन् । उनीहरुले उपलव्ध गराएका जानकारीहरुलाई सामान्य नागरिकले बुझ्ने हिसावमा हामिले यहाँ प्रस्तुत गरेका छौं ।
को हुन् जालिम मुखिया?
भारतीय सुरक्षा अधिकारी र मिडियाले जालिम मुखिया भने पनि उनको नाम चाहिँ जालिम मियाँ हो। पन्चायतकालमा गाउँको प्रधानपञ्चमा बिजयी भएकाले उनको नाममको पछाडि मुखिया थरकै रुपमा झुन्डियो। वीरगन्जबाट करिब ३० किलोमिटर उत्तर पश्चिममा रहेको जगरनाथपुर निवासी ६१ वर्षीय जालिम मियाँ जगरनाथपुर गाउँपालिकाका प्रमुख हुन्। स्थानीय तहको निर्वाचनमा उनी तत्कालीन माओवादी केन्द्रबाट निर्वाचीत भएका हुन्।
२०३५ मा पन्चायतकालमा भएको गाउँ पञ्चायतको चुनावमा जालिम मियाँ प्रधानपन्चमा विजयी भएका थिए। त्यसबेलादेखि नै गाउँघरमा बोलाउने जालिम ‘मुखिया’ नै उनको परिचय बन्यो। उनका समकक्षी अन्य मुखियाका अनुसार पन्चायतकालमा जालिम वन कटानमा बढी संलग्न हुन्थे। जानकारका अनुसार तत्कालीन राजा महेन्द्र हेटौंडा सवारी भएको बेला पर्साका केही मुखियाहरु जालिमको विरुद्धमा डेलिगेसनसमेत गएका थिए।
०३७ सालतिर उनको गाउँमा छापामारी हुँदा ४० वटा टायर (बयलगाडा) मा लोड भएको काठ बरामद भएको थियो। पन्चायतको अन्त्यतिर जालिममाथि वन मुद्दासमेत दर्ता भएको थियो। जिल्ला अदालत हुँदै सर्वोच्चसम्म चलेको उक्त मुद्दामा जालिम माथि २ महिना कैदको सजाय समेत भएको थियो।
काठको तस्करीबाट सुरु गरेर, जलिम मियाँलाई आईएसआईको आदेशमा भारतीय नक्कली नोटको कारोबारको आरोप छ ।
बहुदल आएपछि जालिम कांग्रेस प्रवेश गरे। क्षेत्रीय सदस्य हुँदै कांग्रेस महाधिवेशन प्रतिनिधीसमेत भए। स्थानीय तहको चुनावमा कांग्रेसबाट उनका भाई सलिम मन्सुर (मोसालिम मुखिया) ले टिकट नपाएपछि स्वतन्त्रबाट उम्मेदवारी दिई ६५ भोटले जितेका थिए। कांग्रेसबाट टिकट पाएका जालिम जिल्ला विकास समितिको सदस्यमा बिजय भएका थिए। कांग्रेसमा उनी पूर्व गृहमन्त्री खुमबहादुर खडका निकट मानिन्थे।
जालिम मियाँलाई पाकिस्तानी नागरिकहरू नेपालको सबैभन्दा ठूलो मुस्लिम धार्मिक बस्ती इजतिमाको बहानामा नेपाल बोलाउन र भारतको निजामुद्दीन क्षेत्रमा अवस्थित मार्कजमा नेपाली परिचयपत्र पठाएको आरोप पनि छ।
०६२/६३ को जनअन्दोलनका क्रममा जिल्लाका अन्य नेतासँग पक्राउ परे पनि प्रहरीले जालिमलाई पुरानो वन मुद्दाको फरार अभियुक्तको रुपमा अदालतमा पेश गरी कारागार पठाएको थियो। पहिलो संविधान सभापछि प्रधानमन्त्री बनेका प्रचण्डबाट टिका लगाएर जालिम माओवादी प्रवेश गरे। पार्टी प्रवेश गराउन तत्कालीन प्रधानमन्त्री प्रचण्ड हेलिकप्टरमा जगरनाथपुर पुगेका थिए। तत्कालीन माओवादीको उनी केन्द्रीय सल्लाहकार समेत भए।
अपराधलाई राजनीतिक पर्दाले लुकाएका जालिम मियाँलाई पूर्वप्रधानमन्त्री एंवम सत्तारूढ नेपाल कम्युनिष्ट पार्टी( नेकपा)का अध्यक्ष पुष्पकमल दाहाल ‘प्रचण्ड’को समर्थन रहेको उल्लेख छ ।
उनी भारतीय गुप्तचर एजेन्सीहरूको नजरमा थिए जब पाकिस्तानबाट आएका नक्कली नोटहरू नेपालका आईएसआई ह्यान्डलर युनुस अन्सारीको आदेशमा भारत पठाउन थालिसकेका थिए। उनको निकटका व्यक्तिहरू नक्कली नोटसहित पक्राउ पर्न थाले पछि उनी केही वर्ष भूमिगत पनि भए ।