वीरगन्जको छपकैयास्थित एक मस्जिदमा बसेका तीन भारतीयमा कोरोना भाइरसको संक्रमण देखिएको छ।
राष्ट्रिय जनस्वास्थ्य प्रयोगशालामा शनिबार गरिएको दोस्रो परीक्षणमा उनीहरूमा कोरोना भाइरस भएको पुष्टि भएको हो।
यसअघि हेटौंडामा गरिएको टेस्टमा उनीहरूमा कोरोना भाइरसको संक्रमण पोजेटिभ देखिएको थियो। हेटौंडाको ल्याबले उनीहरूको स्वाब थप परीक्षणका लागि शनिबार नै काठमाडौं पठाएको थियो।
नारायणी उपक्षेत्रीय अस्पतालमा उपचार गरिरहेका तीन जना भारतीयको ट्राभल हिस्ट्री पत्ता लगाउन कठिन भएको छ।
‘हामीलाई तीन भारतीयलाई कोरोना पोजेटिभ भेटिएको सूचना आएको छ। लगत्तै मैले पर्साका सिडिओ, वीरगञ्जका मेयरसँग कुराकानी गरेको छु। उनीहरूको अवस्थाबारे नारायणी उपक्षेत्रीय अस्पतालका मेडिकल सुपरिटेन्डेन्टसँग कुरा भएको छ,’ मुख्यमन्त्री राउतले भने,‘उनीहरू लक डाउनअघि नै आएका रहेछन्। उनीहरु मस्जिदहरुमा नमाज पढ्ने र पढाउने र प्रार्थनाको काम गर्छन्। त्यसैले उनीहरुको विषयमा सूचना संकलन गर्न हामीले पूरा तागत लगाएका छौं।’
मुख्यमन्त्री राउतले पूरा तागत लगाएर उनीहरूको ट्राभल हिस्ट्री पत्ता लगाउन लागेको भने पनि क्वारेन्टाइनमा राखिएको ४८ घन्टासम्म पनि उनीहरू कहाँकहाँ गए भन्ने विवरण प्रशासनले पत्ता लगाउन सकेको छैन।
‘उहाँहरूले कुरा राम्रोसँग भन्नुभएको छैन। हामी विभिन्न माध्यमबाट विवरण संकलन गरिरहेका छौं,’ पर्साका सहायक प्रमुख जिल्ला अधिकारी ललित बस्नेतले भने।
प्रहरीसँग उनीहरूमध्ये केहीले आफूहरू गत डिसेम्बरमै नेपाल आएको र सप्तरीमा भएको इस्तेमामा सहभागी भएको बताएका छन्।
प्रहरीका अनुसार सप्तरीमा गत फेब्रुअरी १४, १५ र १६ तारिखमा इस्तेमा भएको थियो। उक्त इस्तेमामा संसारका विभिन्न मुलुकबाट मुस्लिम धर्मालम्बीहरू आएका थिए।
उक्त इस्तेमामा आएका १३ जना इन्डोनेसियन गत चैत १९ गते काठमाडौं आइपुगेका थिए। लक डाउनका बेला प्रशासनले पास बनाएर उनीहरूलाई सप्तरीबाट काठमाडौं पठाएको थियो।
धुलिखेलको मस्जिदमा बस्न भनेर आएका उनीहरूलाई त्यहाँ बस्न नदिइएपछि ललितपुरको इमाडोलस्थित मस्जिदमा राखिएको थियो।
स्थानीयहरूले विरोध गरेपछि उनीहरूलाई त्यहाँबाट निकालेर प्रहरीले अन्तै लगेको छ। उनीहरूलाई कुन ठाउँमा राखिएको थियो भन्ने प्रहरीले खुलाएको छैन।
जालिम मुखियाले नेपाल ल्याएका थिए
भारतीय मिडियामा अत्यधिक नाम लिइएका पर्सा जगरनाथपुर गाउँपालिकाका अध्यक्ष जालिम मुखियाले चैत्र १९ गते नेपाल प्रवेश गराएका २४ तवलिगी जमातीहरु मध्ये ३ जनालाई कोरोना संक्रमण भएको पाइएको छ
चैत्र १९ गते नेपाल प्रवेश गर्नुअघी जमातीलाई भारतीय सुरक्षाकर्मीले रोक्ने प्रयास गरेपनि उनीहरुले ढुङगामुढा गरि नेपालतर्फ प्रवेश गरेको र त्यहाँबाट जगरनाथपुरका अध्यक्ष मुखिया सहितले १० वटा मोटरसाइकलको व्यवस्था गरि नेपाल प्रवेश गराएका थिए।
नेपाल प्रवेश गराइएका जमाती मध्ये अधिकांश भारतीय तथा केहि इन्डोनेशियाका र पाकिस्तानी समेत भएको सुरक्षा स्रोतले जनाएको छ। प्रदेश नम्वर २का आन्तरिक मामिला मन्त्रालय स्रोतका अनुसार रौतहट, सप्तरी, सिराहामा गरि ३ सय ४९ जमातीहरु रहेको बताइएको छ। सुरक्षाकर्मीहरुले उनीहरुको खोजी शुरु गरेको बताइएको छ। केहि जमातीहरु सुनसरी र मोरङगमा पनि रहेको सुरक्षा स्रोतको दावी छ।
