काठमाडौं- कोरोना भाइरसका कारण यतिवेला विश्वमा महामारी फैलिएको छ ।
कोरोना भाइरस संक्रमणको प्रभावमा रहेका धेरै देशहरुले आन्तरिक तथा वाह्य उडान रोकेका छन् भने आफ्ना देशका सीमा नाकाहरु समेत सिल गरेका छन् । नेपालले अन्तर्राष्ट्रिय हवाइ उडान रोकेको छ ।
अत्यावश्यक कामबाहेक बाहिर ननिस्कन भन्दै सरकारले लकडाउन गरेको छ ।
विश्वका विभिन्न मुलुकले कोरोना संक्रमणको त्रासका कारण लकडाउन गरिरहेका छन् ।
यस्तो परिस्थितिमा वैदेशिक रोजगारीमा गएका नेपालीसमेत विदेशी भूमिमा नै रोकिएका छन् ।
वैदेशिक रोजगारीकालागि गएका देशले स्वदेश फर्कन अनुमति दिएको भएपनि नेपालमा उडान रोकिनु र देशमा लागेको लकडाउनका कारण नेपालीहरु विदेशी भूमिमा नै रोकिएका छन् ।
लाखौं नेपाली वैदेशिक रोजगारीका क्रममा विदेशमा रहेका छन् ।
शवसमेत उतै रोकियो
वैदेशिक रोजगारीका लागि विदेशी भूमिमा रहेको अवस्थामा ज्यान गुमाएकाको परिवारको अवस्था त झन् यतिबेला निकै पीडादायी बनेको छ ।
विदेशी भूमिमा ज्यान गुमाएका आफन्तको शवसमेत ल्याउने वातावरण कोरोना भाइरसका कारण रोकिएको अवस्थामा छ ।
खाडी मुलुक यूएईमा कार्यरत नुवाकोट बेलकोटगढी–१२ का ३५ वर्षीय हरिशरण डोटेलले एक हप्ता अघि ज्यान गुमाए । तर उनको शव तत्काल नेपाल ल्याउने अवस्था रहेको छैन । कोरोना भाइरसका कारण उनको शव नेपाल ल्याउन प्रकृयासमेत अघि बढ्न सकेको छैन ।
विदेशमा रहेका राजदूतावासले यतिबेला अत्यावश्यक सेवा फोनबाट समाधान गरिरहेका छन् ।
नेपालमा रहेको वैदेशिक रोजगार बोर्डको पनि नियमित सेवा बन्द रहेको छ । उसले विदेशमा ज्यान गुमाएकाको शव ल्याउने बाहेकका अन्य काम रोकेको छ । तर डोटेलको शव ल्याउने प्रकृयासमेत शुरु हुन सकेको छैन ।
आबुधावीस्थित बेभर्ली हिल्स मेडिकल सेन्टरमा कार्यरत डोटेल एक हप्ताअघि आफ्नै कोठामा मृत भेटिएका थिए ।
आइतबार आफ्नै कोठामा झुण्डिएको अवस्थामा मृत भेटिएका डोटेलको मृत्युबारे गएको सोमबार दूतावासमा जानकारी आएपछि दूतावासले कम्पनीमा सम्पर्क गरेको थियो ।
कम्पनीको निवास छोडेर बाहिर बस्दै आएका हरिशरण काममा लगातार दुई दिनसम्म नआएको भन्दै कम्पनीले खोजी गरिरहेको जनाएको थियो ।
दूतावासका अनुसार कोठामा झुन्डिएर आत्महत्या गरेको भन्दै सँगै बस्दै आएकी नुवाकोटकै एक महिला र अन्य दुई पुरुष दूतावासमा पुगेका थिए ।
मृत्यु शंकास्पद भएको परिवारले दाबी गर्दै आएको छ ।
अनुसन्धानका लागि भन्दै हरिशरणसँग बस्दै आएकी महिलालाई स्थानीय प्रशासनले पक्राउ गरेको छ ।
उनले आत्महत्या गरेको भन्दै दूतावासमा उनीसँगै बस्दै आएका व्यक्ति पुगेको भएपनि परिवारका सदस्य भने उनको हत्या भएको आशंका गर्छन् । तर कोरोना भाइरसको महामारीकाबीच पोस्टमार्टम रिपोर्ट आउनसमेत सकेको छैन ।
आफूहरुले छानविनको माग गरेको भएपनि अहिलेको अवस्थामा त्यो अघि बढ्न नसकेको हरिशरणका भतिज अश्विन डोटेलले बताए ।
आफ्ना काका कमजोर मानसिकता भएको व्यक्ति नभएको भन्दै उनले आत्महत्या गरेको कुरामा विश्वास गर्न नसकिने बताए ।
उनले शव ल्याउन कति समय लाग्छ भन्ने थाह नभएको बताए ।
गत मंसिरमा १५ दिनको छुट्टीमा आएर हरिशरण फर्किएका थिए । २०७२ सालको विनाशकारी भूकम्पमा छोरो गुमाएका उनले १३ वर्षको उमेरमा नै बुवालाई गुमाएका थिए । त्यस्तै उनले केही वर्ष पहिला दाजुलाई गुमाएका थिए । उनकी श्रीमती र १४ वर्षीया छोरी अहिले नुवाकोटमा छन् ।
विदेशी भूमिमा ज्यान गुमाएका पति र बुवाको शव समेत समयमै सद्गत गर्न नपाएपछि उनीहरुको पीडा कम छैन । विदेशी भूमिमा पति र बुवा गुमाउनु परेको पीडामा डोटेल परिवारलाई कोरोना भाइरसले थप पीडा दिएको छ ।
