कोरोना भाइरस (कोभिड–१९) बाट विश्वभर ज्यान गुमाउने मानिसको संख्या ३७ हजार नाघेको छ । गुगलले तयार पारेको तथ्यांकअनुसार मंगलबार बिहान साढे १० बजेसम्म विश्वभर मृत्यु हुने मानिसको संख्या ३७ हजार ६ सय ३९ नाघेको हो ।
ज्यान गुमाउनेमध्ये इटालीमा सबैभन्दा धेरै ११ हजार ५ सय ९१ जनाको ज्यान गएको छ । त्यस्तै स्पेनमा ७ हजार ७ सय १६ जनाले ज्यान गुमाएका छन् । चीनमा पनि मृत्यु हुनेको संख्या ३ हजार ३ सय ४ पुगेको छ भने अमेरिकामा पनि ज्यान गुमाउने ३ हजार १ सय ४६ पुगेका छन् ।
विश्वभर समग्र संक्रमितको संख्या पनि ७ लाख ८४ हजार ७ सय १६ नाघेको छ । जसमध्ये सबैभन्दा धेरै अमेरिकामा संक्रमितको संख्या १ लाख ६३ हजार ४ सय ७९ पुगेको छ । इटालीमा समग्र संक्रमित १ लाख १ हजार ७ सय ३९ रहेका छन् । त्यस्तै स्पेनमा समग्र संक्रमितको संख्या ८७ हजार ९ सय ५६ पुगेको छ भने चीनमा ८१ हजार ४ सय ७० मानिसहरुमा यो भाइरसको संक्रमण देखिएको छ ।
भाइरसको संक्रमणबाट निको हुनेमा चीन सबैभन्दा अगाडि छ । अहिलेसम्म चीनमा यो भाइरस संक्रमण पुष्टि भएपछि निको भएर घर फर्किने मानिसको संख्या ७५ हजार ७ सय ७० छ ।
स्पेनमा करिब १७ हजार मानिस निको भएर घर फर्किएका छन् भने इटालीमा पनि १४ हजारभन्दा धेरै मानिस भाइरस संक्रमण पछि निको भएर घर फर्किएका हुन् । त्यस्तै इरान र जर्मनीमा पनि १३ हजारभन्दा धेरै मानिस निको भएर फर्किएका छन् ।
