कोरोना भाइरसका कारण समस्या परेका व्यवसायीले आफ्ना श्रमिकलाई तलबी विदा दिन, बेतलवी विदा दिन, अल्पकालीन वा पूर्ण रुपमा उनीहरुको तलब कटौती गर्न, बेतलबी रुपमा राख्न समेत पाउने गरी युएईको मानव संशाधन मन्त्रालयले निर्णय गरेको छ ।
कोरोना भाइरसको महामारीले विश्व आक्रान्त भइरहेको र विभिन्न मुलुकलाई आर्थिक रुपमा ठूलोे जोखिम आइपर्ने स्थितिको आँकलन भइरहँदा युएईले विदेशी श्रमिकको तलब कटौती गर्न सक्ने निर्णय गरेको छ । तर यस्तो निर्णय युएईका नागरिकलाई भनें लागु नहुने सो मन्त्रालयको निर्णय छ ।
गल्फ न्यूजका अनुसार कोरोना भाइरसका कारण समस्यामा परेका व्यवसायीहरुले आफ्ना विदेशी कामदारलाई कार्यस्थलमा नआई काममा लगाउन, उनीहरुलाई तलवी विदा दिन, बेतलवी विदा दिन, समस्या अवधिसम्म तलव घटाउन वा पूर्ण रुपमा तलव काट्न पाउनेछन् ।
यो निर्णय तत्कालै लागु हुनसक्ने निर्णय गरिएको छ । यसले युएईमा कार्यरत लाखौं विदेशी श्रमिकको तलवको सुरक्षा प्राप्त गर्न नसक्ने अवस्था सिर्जना गरेको छ ।
